1994 అక్టోబర్ 13వ తేదీ గురువారము విజయదశమి రోజు ఇప్పుడు మందిరము ఉన్న స్థలంలో శ్రీసాయిబాబా వారి సిమెంట్ విగ్రహము పలువురు సాయిభక్తుల సమక్షంలో ఏర్పాటు చేయుట జరిగినది. ఆరోజు నుండి దినదిన ప్రవర్ధమానమై భక్తులకోర్కెలను తీరుస్తూ 1995 లో విశాలప్రాంగణములో మందిరము నిర్మాణము ప్రారంభమైనది.1998 మార్చి 15వ తేదీన 6 అడుగుల 3 అంగుళముల పాలరాతి విగ్రహం ప్రాణప్రతిష్ట జరిగినది. ఈ ప్రాణప్రతిష్ట కార్యక్రమము శ్రీమహాభాష్యం రంగాచార్యులు గారు,శ్రీసాయి లీలమ్మ గార్ల చేతులమీదుగా జరిగినది.2000వ సంవత్సరారంభంలో "ఓం సాయి శ్రీ సాయి జయ జయ సాయి" నామ అఖండ సంకీర్తనా మహాయజ్ఞం సప్తసప్తాహ దీక్షతో జరిగింది.మూడు అంతస్తులతో మందిరము నిర్మితమైనది.2007వ సంవత్సరములో 54 అడుగుల విరాట్ సాయి బాబా విగ్రహావిష్కరణ జరిగినది. ఈ కార్యక్రమాన్ని హైదరాబాద్ రమణి బాబాగారు, పెదముత్తేవి ఆశ్రమ పీఠాధిపతి సీతారామయతీంద్రుల వారి చేతుల మీదుగా జరిగినది.2011వ సంవత్సరములో ఇండియన్ బుక్ ఆఫ్ వరల్డ్ రికార్డ్స్ వారిచేత "ది లార్జెస్ట్ సాయిబాబా స్టాట్యూ ఇంది వరల్డ్" అనే పురస్కారము ఈ మందిరమునకు ఇవ్వబడినది. షిరిడీలో మాదిరి 4 హారతులు,ప్రతి ఉదయము బాబాకు అభిషేకము, అనంతరము లఘు హారతి, ప్రతి గురువారము రాత్రి ఎనిమిదిన్నర గంటలకు పల్లకీ సేవ, ప్రతి గురువారం మందిరమునకు విచ్చేయు భక్తులందరికీ అన్నప్రసాద వితరణ జరుగుతున్నది. ఇప్పటికీ పలు అభివృద్ధి కార్యక్రములతో ఈ మందిరం దినదిన ప్రవర్థమాన మగుచు భక్తులకు కొంగుబంగారమై విరాజిల్లుచున్నది.